ಮಧುಗಿರಿ ಬೆಟ್ಟದೆಡೆಗಿನ ಚಾರಣ

ಮಧುಗಿರಿ ಬೆಟ್ಟದೆಡೆಗಿನ ಚಾರಣ

ಫೆಬ್ರವರಿ 16ರಂದು 15ಜನ ಸಾಹಸಪ್ರಿಯ ನವ ಯುವಕರು ಮಧುಗಿರಿ ಬೆಟ್ಟವನ್ನು ಹತ್ತಲು ಹೊರಡಲಿರುವರು. ಅವರೆಲ್ಲರಿಗೂ ಚಾರಣವು ಸುಸೂತ್ರವಾಗಿ ಕೈಗೂಡಲೆಂದು ಹಾರೈಸುತ್ತಾ ಚಾರಣದ ಬಗ್ಗೆ ಕೆಲವು ಸಂಕ್ಷಿಪ್ತ ವಿವರಣೆಗಳನ್ನು ನೀಡಲು ಆಶಿಸುವೆ.

ಮಧುಗಿರಿ ಬೆಟ್ಟವು ತುಮಕೂರು ಜಿಲ್ಲೆಯಲ್ಲಿರುವುದು. ಮಧುಗಿರಿ ಬೆಟ್ಟವು ಏಕಶಿಲೆಯ ಬೆಟ್ಟ ಹಾಗೂ ಇಡೀ ಏಷ್ಯಾದಲ್ಲೇ ಎರಡನೇ ಅತಿ ಎತ್ತರದ ಏಕಶಿಲೆಯ ಬೆಟ್ಟ. ಇದರ ಎತ್ತರ ಸುಮಾರು 3930 ಅಡಿ.

ಹಾಗಾಗಿ ಈ ಬೆಟ್ಟವನ್ನು ಹತ್ತುವವರು ಏಷ್ಯಾದಲ್ಲಿನ ಇತರೆ ಏಕಶಿಲೆಯ ಬೆಟ್ಟವನ್ನು ಸುಲಭವಾಗಿ ಹತ್ತಬಹುದು.

ಅನೇಕ ಬೆಟ್ಟಗಳನ್ನು ಪ್ರಪಂಚದಲ್ಲಿನ ಅತಿ ಎತ್ತರದ ಏಕಶಿಲೆಯ ಬೆಟ್ಟಗಳೆಂದು ಹೇಳುತ್ತಾರೆ. ಆದರೆ ಈ ಹೇಳಿಕೆಗೆ ಭೂಗರ್ಭಶಾಸ್ತ್ರದ ಪುರಾವೆಗಳಿರುವುದಿಲ್ಲ ಹಾಗೂ ಕೇವಲ ಎತ್ತರ ಅಥವಾ ಸುತ್ತಳತೆಯನ್ನೇ ಆಧಾರವಾಗಿರಿಸಿಕೊಂಡು ಆ ರೀತಿಯಾಗಿ ಹೇಳುವರು. ಹಾಗೂ ಎತ್ತರವನ್ನು ಸಮುದ್ರಮಟ್ಟದಿಂದಲೋ ಅಥವಾ ಬೆಟ್ಟದ ಬುಡದಿಂದಲೋ ಪರಿಗಣಿಸಿರಬಹುದು. ಎತ್ತರವು ಸಮುದ್ರ ಮಟ್ಟದಿಂದ ಎಂದು ಪರಿಗಣಿಸಿದಲ್ಲಿ ಬೆಟ್ಟದ ಬುಡವೇ ಸಮುದ್ರ ಮಟ್ಟದಿಂದ 1000 - 2000 ಅಡಿ ಎತ್ತರದಲ್ಲಿದ್ದಲ್ಲಿ ಬೆಟ್ಟದ ಆರೋಹಣವು ಪ್ರಾರಂಭವಾಗುವುದೇ 1000 - 2000 ಅಡಿ ಎತ್ತರದಿಂದ ಪ್ರಾರಂಭವಾಗುವುದಿಲ್ಲವೇ? ಹಾಗಾಗಿ ನಿಖರವಾಗಿ ಎಷ್ಟು ಅಡಿ ಎತ್ತರವನ್ನು ಏರಬೇಕು ಎಂಬುದನ್ನು ಸರಿಯಾಗಿ ತಿಳಿದುಕೊಳ್ಳಬೇಕು.

ಮಧುಗಿರಿಯ KSRTC ಬಸ್ಸು ನಿಲ್ದಾಣದಿಂದ ಎಡಗಡೆಗೆ 260 ಮೀಟರ್ ನಡೆದು ಖಾಸಗಿ ಬಸ್ ನಿಲ್ದಾಣಕ್ಕೆ ಮುಂಚಿತವಾಗಿ ಕೋಟೆಗೆ ಹೋಗುವ ಮಾರ್ಗವಿರುವುದು. ಕೋಟೆ ಬಾಗಿಲನ್ನು ದಾಟಿದ ನಂತರ ಅಲ್ಲಿ ಪೊಲೀಸ್ ಅಧಿಕಾರಿ ಇದ್ದಲ್ಲಿ ನಿಮ್ಮ ವಿವರಗಳನ್ನು ಸಲ್ಲಿಸಿ ಮುಂದುವರಿಯಬೇಕು.

ಬೆಟ್ಟವನ್ನೇರುವಾಗ ಅನೇಕ ಕೋಟೆಗೊಡೆಗಳನ್ನು ನೋಡುತ್ತೀರಿ. ಬೆಟ್ಟವನ್ನು ನಾಲ್ಕು ಹಂತಗಳಲ್ಲಿ ಏರುತ್ತೀರಿ.

ಮೊದಲನೇ ಹಂತದಲ್ಲಿ ವಿಶಾಲವಾದ ಮೆಟ್ಟಿಲುಗಳಿದ್ದು ಹತ್ತುವುದು ಸುಲಭ.

ಎರಡನೇ ಹಂತದಲ್ಲಿ ಮೆಟ್ಟಿಲುಗಳು ಚಿಕ್ಕದಾಗುತ್ತಾ ಒಂದೆಡೆ ಕಂಬಿಗಳು ಸಹಾಯಕ್ಕೆ ಇರುವುದು. ಈ ಹಂತವನ್ನೂ ಕಂಬಿಗಳ ಸಹಾಯದಿಂದ ಹತ್ತಬಹುದು.

ಮೂರನೇ ಹಂತದಲ್ಲಿ ಮೆಟ್ಟಿಲುಗಳು ಅತಿ ಸಣ್ಣದಾಗಿದ್ದು (ಒಂದು ಅಡಿ ಅಗಲ) ಕಂಬಿಗಳ ಸಹಾಯದಿಂದ ಕಷ್ಟಪಟ್ಟು ಹತ್ತಬಹುದು.

ನಾಲ್ಕನೇ ಹಾಗೂ ಕೊನೆಯ ಹಂತವು ಅಪಾಯಕಾರಿಯಾದದ್ದು. ಈ ಹಂತದಲ್ಲಿ ಮೆಟ್ಟಿಲುಗಳು ಸಣ್ಣದಾಗಿ ಹಾಗೂ ಡೊಂಕಾಗಿರುವುದು ಹಾಗೂ ಕಂಬಿಗಳು ಕೇವಲ ಅರ್ಧ ಮಾರ್ಗದವರೆಗೆ ಮಾತ್ರ ಇರುತ್ತದೆ. ಇಲ್ಲಿಂದ ಕೂಡಾ ಸುತ್ತಲಿನ ಪ್ರಕೃತಿಯ ಸುಂದರ ದೃಶ್ಯಗಳನ್ನು ನೋಡಬಹುದು. ಇಲ್ಲಿಂದ ಮೇಲೆ ಕಷ್ಟಪಟ್ಟು ಹೋದಲ್ಲಿ ಬೆಟ್ಟದ ತುದಿಯನ್ನು ತಲುಪಬಹುದು. ಬೆಟ್ಟವನ್ನೇರಲು ಸುಮಾರು 2 ರಿಂದ 3 ಘಂಟೆ ಬೇಕಾಗಬಹುದು (ಅಲ್ಲಲ್ಲೇ ವಿಶ್ರಾಂತಿಯನ್ನು ಪಡೆದಲ್ಲಿ).

ಬೆಟ್ಟವನ್ನು ಇಳಿಯಲು ಸುಮಾರು ಒಂದು ಘಂಟೆ ಬೇಕಾಗಬಹುದು ಹಾಗೂ ಅತಿ ಎಚ್ಚರಿಕೆಯಿಂದ ಇಳಿಯಬೇಕು, ಏಕೆಂದರೆ, ಸಾಮಾನ್ಯವಾಗಿ ಬೆಟ್ಟವನ್ನೇರುವುದಕ್ಕಿಂತ ಇಳಿಯುವುದು ಅತಿ ಅಪಾಯಕಾರಿ.

ಮಧ್ಯಾನ್ಹ ಒಂದು ಘಂಟೆಗಿಂತ ಮುಂಚೆಯೇ ಇಳಿಯಲು ಪ್ರಾರಂಭಿಸಬೇಕು.

ಮಧುಗಿರಿಯ ನಾಳೆಯ ಉಷ್ಣತೆಯು - 32℃ - ಸಾಮಾನ್ಯಕ್ಕಿಂತ 1℃ ಹೆಚ್ಚಿರುವುದು.

ನೀವು ಬೆಟ್ಟಹತ್ತುವ ಸಮಯದಲ್ಲಿ - 28℃ ಹಾಗೂ ಬೆಟ್ಟದ ಶಾಖವನ್ನು ಸೇರಿ - 32℃

ಬೆಟ್ಟವನ್ನು ಇಳಿಯುವ ಸಮಯದಲ್ಲಿ - 30℃

ಹಾಗೂ ಬೆಟ್ಟದ ಶಾಖವನ್ನು ಸೇರಿ - 34℃

ಬೆಟ್ಟವನ್ನೇರುವಾಗ ನಿಮ್ಮೊಂದಿಗೆ ಒಣ ದ್ರಾಕ್ಷಿ, ಖರ್ಜೂರ, ಶಕ್ತಿಯನ್ನು ನೀಡುವ ದ್ರವ ಪದಾರ್ಥ ಹಾಗೂ ನೀರನ್ನು ತೆಗೆದುಕೊಂಡು ಹೋಗಿ.

ಎಣ್ಣೆಯಿಂದ ಕರಿದ ಪದಾರ್ಥಗಳಾದ ಚಕ್ಕುಲಿ, ನಿಪ್ಪಟ್ಟು ಇತ್ಯಾದಿಗಳನ್ನು ಬೆಟ್ಟವನ್ನಿಳಿದ ಮೇಲೆ ಯಥೇಚ್ಛವಾಗಿ ತಿನ್ನಿರಿ.

ಎಚ್ಚರ : ನಿಮ್ಮನ್ನು ಬೆಂಗಳೂರಿನಿಂದ ಕರೆದೊಯ್ಯುವ ನಿಮ್ಮ ಮಾರ್ಗದರ್ಶಿಯು ಮಧುಗಿರಿ ಬೆಟ್ಟವನ್ನೇರುವುದು ಅತಿ ಸುಲಭವೆಂದು ಹೇಳಿದಲ್ಲಿ ಅದನ್ನು ಖಂಡಿತ ನಂಬಬೇಡಿ. ಈ ಚಾರಣವನ್ನು ಚಾರಣ ಸಂಸ್ಥೆಗಳು “Moderately difficult” ಎಂದು ವರ್ಗೀಕರಿಸಿದ್ದಾರೆ. ನೀವು ಒಂದೇ ದಿನದಲ್ಲಿ ಸುಮಾರು 3900 ಅಡಿ ಮೇಲೇರುವಿರಿ ಹಾಗೂ ಅಷ್ಟೇ ಕೆಳಗೆ ಇಳಿಯುವಿರಿ. ನಿಮ್ಮ ಮಂಡಿಗಳ ಬಗ್ಗೆ ಜಾಗ್ರತೆ ವಹಿಸಿರಿ. ನಿಮಗೆ ನಾಲ್ಕನೇ ಹಂತವನ್ನೇರಲು ಕಠಿಣವೆನಿಸಿದಲ್ಲಿ ಯಾರ ಒತ್ತಾಯಕ್ಕೂ ಮುಲಾಜನ್ನು ನೀಡದೆ ನಿಧಾನವಾಗಿ ಕೆಳಗಿಳಿಯಿರಿ. ಏಕೆಂದರೆ :-

ನಿಮ್ಮ ದೇಹದ ಮೇಲೆ ವಿಶೇಷ ಕಾಳಜಿ ವಹಿಸಿ. ಶರೀರಕ್ಕೆ ಯಾವುದೇ ಅಪಾಯವಾಗದಂತೆ ನೋಡಿಕೊಳ್ಳಿ, ಏಕೆಂದರೆ ಹಳೇ ಮಾಡೆಲ್ ಗಾಡಿಗಳಿಗೆ ಬಿಡಿಭಾಗಗಳು ಯಾವುದೇ ಅಂಗಡಿಗಳಲ್ಲಿ ದಾಸ್ತಾನು ಇರುವುದಿಲ್ಲ, ಅಪರೂಪಕ್ಕೆ ಇದ್ದರೂ ಅದು ನಿಮಗೆ ಸಮಯಕ್ಕೆ ಸರಿಯಾಗಿ ದೊರಕುವುದಿಲ್ಲ. ಏಕೆಂದರೆ ನಾವೆಲ್ಲರೂ 40 ಅಥವಾ 50 / 55 ರ ಮಾಡೆಲ್ ಗಳು ಹಾಗೂ ಆ ದಶಕದ ಮಾಡೆಲ್ ಗಳಿಗೆ ವಾರಂಟಿ ಅವಧಿ ಎಂದೋ ಮುಗಿದುಹೋಗಿದೆ ಹಾಗೂ ಅದರ ಗಡುವು (expiry) ದಿನಾಂಕವು ಇನ್ನೇನು ಸಮೀಪಿಸಲಿದೆ   ... ಎಚ್ಚರಿಕೆಯು ಒಳ್ಳೆಯದು. ನಾವುಗಳೆಲ್ಲಾ ಹೆಚ್ಚಿಲ್ಲದ ಆವೃತ್ತಿಗಳು (Limited edition)ಎಂಬುದನ್ನು ಆಗಾಗ್ಗೆ ಜ್ಞಾಪಿಸಿಕೊಳ್ಳುತ್ತಿರಿ.

ನಿಮ್ಮ ಚಾರಣ ಸಾಹಸಕ್ಕೆ ಮತ್ತೊಮ್ಮೆ ಹಾರ್ದಿಕ ಶುಭಾಶಯಗಳು.

ಹೆಚ್ಚಿನ ಮಾಹಿತಿ:-

ಹದಿಮೂರು ಅತಿ ಎತ್ತರದ ಏಕಶಿಲಾ ಬೆಟ್ಟಗಳ ಬಗ್ಗೆ ಸ್ವಲ್ಪ ಮಾಹಿತಿಯನ್ನು ತಿಳಿಯೋಣವೇ!

1.    ಬುಕಿಟ್ ಕೇಲಮ್ - ಇಂಡೋನೇಷಿಯಾದ ಪಶ್ಚಿಮ ಕಲಿಮಂಥನ್ ಪ್ರದೇಶದಲ್ಲಿನ ಸಿಂಟಾಗ್ ನಗರದಲ್ಲಿರುವುದು. ಬೆಟ್ಟದ ಎತ್ತರ 3000 ಅಡಿ.

2.    ಸ್ಟೋನ್ ಮೌನ್ಟನ್ - ಅಟ್ಲಾಂಟ (USA) - ಬುಡದಿಂದ 825 ಅಡಿ ಎತ್ತರ

3.    ಸ್ಟಾವಾಮಸ್ ಚೀಫ್ - ಉತ್ತರ ಅಮೆರಿಕ - ಎತ್ತರ 2300 ಅಡಿ

4.    ಎಲ್ ಪೆನಾನ್ ಡೇ ಗೂವಾಟಪೆ - ಕೊಲಂಬಿಯಾ - ಎತ್ತರ 650 ಅಡಿ

5.    ಪೆನ ಡೇ ಬೆರ್ನಲ್ - ಮೆಕ್ಸಿಕೋ - ಎತ್ತರ 1148 ಅಡಿ

6.    ರಾಕ್ ಆಫ್ ಜೀಬ್ರಾಲ್ಟರ್ - ಸ್ಪೈನ್ ದೇಶದ ದಕ್ಷಿಣ ತೀರ. ಇದು UK ಗೆ ಸೇರಿದ ಸಾಗರೋತ್ತರ ಪ್ರದೇಶ - ಎತ್ತರ 1396 ಅಡಿ.

7.    ಎಲ್ ಕ್ಯಾಪ್ಟನ್ - ಯೋಸೇಮಟಿ ಕಣಿವೆಯಲ್ಲಿನ ರಾಷ್ಟ್ರೀಯ ಉದ್ಯಾನವನದಲ್ಲಿದೆ. (USA) - ಬುಡದಿಂದ ಎತ್ತರ 3000 ಅಡಿ.

8.    ಟೊರೆಸ್ ಡೆಲ್ ಪೈನೆ - ಪಟಗೋನಿಯನ್ - ಚಿಲಿ - ಎತ್ತರ - 8200 ಅಡಿ

9.    ಡೇವಿಲ್ಸ್ ಟವರ್ - ಕೃಕ್ ಕೌಂಟಿ - USA- ಎತ್ತರ 1267 ಅಡಿ

10. ಸಿಗಿರಿಯ - ಶ್ರೀಲಂಕಾ - ಎತ್ತರ - 1214 ಅಡಿ

11.  ಶುಗರ್ ಲೋಫ್ ಮೌಂಟನ್ - ಪೋರ್ಚುಗೀಸ್ - ಎತ್ತರ - 1299 ಅಡಿ

12.  ಝುಮ ರಾಕ್ - ಆಸ್ಟ್ರೇಲಿಯಾದ ಉಲುರು ಪ್ರಾಂತ್ಯ - ಎತ್ತರ - 2378 ಅಡಿ

13.  ಉಲುರು / ಆಯೆರ್ಸ್ ರಾಕ್ - ಆಸ್ಟ್ರೇಲಿಯಾ - ಎತ್ತರ 1142 ಅಡಿ.